( سلسلة فى بيتنا مراهق )
بقلم / سمر جرجس مرقص
اخصائية ارشاد نفسى و اسري و زواجى و تعديل سلوك
عضو إتحاد المعالجين النفسيين العرب
كل بيت في مراهق في قصة ..
قصة خوف أو قلق أو حيرة … وأحياناً قصة حب كبيرة مش عارفين نعبر عنها صح
كتير من الأهالي بيوصلوا لمرحلة المراهقة وهما حاسين إنهم داخلين على ( منطقة ألغام)
لكن الحقيقة إن المرحلة دي مش خطر زي ما الناس فاكرة هي بس محتاجة «وعي» و«طريقة تعامل مختلفة»
علشان كده قررنا نفتح معاكم الباب لسلسلة مقالات تحت عنوان (فى بيتنا مراهق)
سلسلة هنتكلم فيها ببساطة وواقعية عن ..
١ – إزاي نفهم المراهق
٢ – إزاي نكسبه بدل ما نخسره.
٣- إزاي نحافظ على علاقتنا باولادنا
٤ – إزاي نبني جسر بين جيلين مش دايماً بيفهموا بعض.
في كل مقاله هتلاقوا موضوع مختلف عملي وقريب منكم علشان تكون الرحلة مع أولادكم المراهقين أهدى وأجمل 💙
يلا نبدأ الرحلة مع أول مقال في السلسلة 💪💪
مرحلة المراهقة ليه مش لازم نخاف منها؟
لو سألت أي أب أو أم إيه أكتر مرحلة بتخوفك في تربية ولادك؟
هنسمع اجابة بتتكرر ( مرحلة المراهقة)
المرحلة اللي بيكون فيها المراهقين
* مش بيطيقوا كلمة
* بيتغيروا فجأة
* بيغلطوا ويردوا
* بيبقوا مش مفهومين
المرحلة اللي بتخلي البيت الكبير ساحة معارك بدل ما يكون حضن دافى
بس الحقيقة المراهقة مش وحش!!
هي مرحلة انتقال مش حرب
هي وقت بيحاول فيه ابنك يلاقي نفسه يفهم هو مين وإزاي يثبت وجوده من غير ما يتوه
كل اللي بيحصل في المراهقة مش تمرد دي (صرخة بحث عن الذات)
لو فهمت المرحلة دى هتطبطب مش هتخاف
المراهق في الوقت ده بيكون في عاصفة هرمونات وتغيرات نفسية وجسدية.
مش دايماً بيعرف يعبّر ومش دايماً بيكون واعي إنه بيجرح بكلماته
لكن جواه طفل بيقولك (طمني إني لسه محبوب وأنا بتغير)
اللي بيخلي المرحلة دي صعبة مش المراهق نفسه لكن طريقة تعاملنا معاه.
لو اتعاملنا معاه كـ خصم هيتقفل و يبعد عنك
لو اتعاملنا معاه كـ إنسان لسه بيتكوّن هيتفتح و يقرب منك
مفتاح مرحلة المراهقة
١– تفهمه قبل ما تحاسبه
٢ – اسمع بدل ما تصرخ
٣ – افهم بدل ما تهاجم
٤ – افتح قلبك بدل ما تقفل الأبواب
لو عايز تحافظ على علاقة صحية مع ابنك أو بنتك المراهق
١- اسمعه من غير مقاطعة
٢- اتعامل معاه باحترام حتى لو اختلفت معاه.
٣ – خليه يحس إنك ضهره مش سجانه
٤ – افهم إن التغيرات اللي بتحصل جواه مش موجهة ضدك
اخيراً..
افتكر دايماً ان ..
المراهقة مش مرحلة و (هتعدي) لاء دي مرحلة (بتبني)
لو زرعت فيها حب وأمان هتحصد راحة وثقة
واللي هتزرعه النهارده هو اللي هتحصديه بكرة
خليك حضن آمن مش ساحة معركة
لو قابلت تمرده بحبك وصمته بصبرك هيفضل قلبه راجعلك حتى لو الدنيا جواه عاصفة ✨
انتظرونا فى المقال القادم من سلسلة فى ( بيتنا مراهق)
هنكلم فيه عن أول خطوة تبني بيها جسر ثقة مع ابنك أو بنتك ♥️♥️
